Direkt zum Seiteninhalt

Hauptmenü:

Raja

News > Tagebuch Raja

Hallo Beatrice,
Wie scho per MMS gseit, isch dr Raja bereits es Johr und es paar "Verquätschti" bi
uns.
Es dunkt mi, das Johr isch schnäller verby gange als die Zyt, wo mir händ miesse warte,
bis er zu uns cho isch.
Nie händ mir bereut, zu unsere zwei ältere Hünd, no en chleine Tibi zu uns z'neh.
Er het sich so supi in unserei Familie integriert, wie wenn das s'Normalschti vo dr Wält wäri. Di Tipp, Beatrice, isch guet gsi.
Sogar de Scharik, wo eigentlich en "Problemhund" isch, het dr Raja wirklig guet aktzeptiert und so gärn, wie unserei ganzi Familie.
Dr Raja git viel Schwung in unsere Hushalt und i bin so froh, dass i mit ihm es Hobby
meh ha, es Hobby wo bedingt, dass me au nach dr Pensionierig use chunt und me sich
au so, so richtig fit cha halte (& zwar bi jedem Wätter).
Dr Hundesport isch für mi (bald 67 J.) öpis ganz Neu's gsi... obwohl unsere Belgier und Schäfer/Briard wirklig sehr guet folge, bin i bereits jetzt sehr stolz, was i mit em Raja alles ha dörfe erreiche. Nie hät i glaubt, dass es mir glingt, so viel mit emene Hund chönne z'mache. I han immer Lüt bewunderet, wo z.B. Agiliti, Begleithungund und was au immer vorgfüehrt händ...... und jetzt bini sälber druf und dra, mit em Raja öbis z'erreiche, woni mir nid hät erträume loh.
Bald fangt unsere Basiskurs a, i freue mi druf und bi voller gueter Erwartig, dass mir au das zämme schaffe.
In dr Hoffnig, mini paar Zyle erreiche Di bi besserem Befinde und dass Du wirklig
gli wieder besser, bzw. guet chasch anesitze, schicke i Dir ganz liebi Griessli
Marianne mit Raja und Family.
Unten link zu es paar Föteli vo unserem chleinschte Sunneschien

Grüezi mitenand,
Wie au die Zyt vergoht; hüt isch's scho 2 Wuche sit i vo Euch allne ha Abschied gnoh.
Aber i ha eigentlich bis jetzt nüt z'beanstande... usser, das d'Marianne mängisch e chli sträng zu mir isch; also wenn si mir öpis zeigt oder wenn si mir öpis verbiete duet, muess i glaub amme scho chli folge. Si seit immer zu mir wini scho en grosse bi, also benimm i mi sehr oft scho eso.
Ich cha nämlig scho sitz mache ich due an dr Leine au anesitze, wenn mir ahalte, über e Stross gönge, oder wenn wieder es "Palaver", mit dene Lüt wo mi so bewundere, losgoht.
Zuedäm los i au scho öfters wenn me mir rüeft... usser i bi grad am öpis aluege, oder am ummeschnuppere; vorallem aber stinkts mir es bitzeli denn, wenn i uf dr grosse Wiese bi und mit em Scharik und Ares due ummespringe...
Au bi ihne weiss i scho genau was iz'due ha. Mir händ dorum au no nie e Kollision gha zämme.
Wenn i mit minere Familie due spiele, weiss i wenn's "pfui" heisst, muess i brämse, vorallem wenn's mi gluschtet mini Lütlis am Aermel oder am Hosebei z'risse. Das macht mir aber nüt us will i so viel Spielsache ha, dass i die jo cha schüttle oder so richtig cha dri bisse.
Was i super find isch, dass i bis jetzt überall cha mitgoh. Im Auto hani es tolls Plätzli, bi guet gsicheret und weiss dass i muess das "Sch....Gschtältli" alege... am Afang hets mi scho apisst...doch mitlerwile isch's mir würkli klar, dass das halt so, viel besser isch.
I lo au kei "Gschiss und Gebäll" ab, wenn i es Momäntli muess allei im Auto warte.
Geschter het en Pudel im Auto näbedra eso dumm do und bällt und kratzt, wo er allei gsi isch, do hani mir miesse säge, das fang i gar nie a. So e Schämmer bruch i! nid.
Mini Schuel hän mir miesse uf e 26. Oktober verschiebe, will mini Chefin chli chrank gsi isch und erscht ab denn wieder es Plätzli frei isch für mi.
Kenne duen i aber totzdäm scho viel: i ha kei Angscht meh vor: Autos Laschtwäge, Döff, Stäge, Wägli woni nonig kenn etc... Sälbscht die riese grosse Hünd wo me Rössli nennt, chönne mi nid eso beidrucke. D' Marianne kennt scho einigi Lüt wo söttigi Viehcher händ.
Hüt gönge mir in d'Stadt wo Basel heisst... ups, mi nimmts wunder, wie's in dämm Trämmli isch.
Jo nu, bis jetzt hani no nüt als so gfährlich empfunde, dass i hätti miesse streike.
s'wird wohl au in däm griene Vehikel nid so schlimm si...
Bisle dueni duesse und wenn i ab und zue mis Bei derbi lüpf, findet dr Bruno, i sigi früehriff und lacht sich fascht kaputt..! !
So, i ha z'Morge gässe, jetz mach i no es Schlöfli und wart bis es hüt wieder losgoht mit neue Sache kenne z'lehre.
Bis bald lg
Raja & Family

...Also, geschter bini in dr Welpespielgruppe gsi und i cha Euch säge, das verdient s'Prädikat SUPER!
Aendlig händ mir die "Schuel" gfunde wo total uf mi abschtimmt isch. Dört gits 2 Gruppe, eini für chlineri und eini für
grösseri "Chnulleri"
..Jo am Afang bini scho chli überrascht gsi, wie viel Kollege in mim Alter dört mitgmacht händ...
I ha zerscht emol alles guet beobachtet, e 9 Wo alte Eurasier hani scho mol rächt miesse abälle, bis i gmerkt ha,
dass dä mir jo absolut gfalle duet und mit ihm hani denn wie ne veruckte gschpielt, i bi sogar vor Verrückti in es Wasserbeckeli gfloge
und ha mi denn brutal miesse schüttle.
Also das isch gewaltig gsi. I ha au gmerkt, dass ich eigentlig scho sehr viel cha für mis Alter.
Mir händ no es paar Muetpröbli gmacht, aber für mi isch das jo kei Problem gsi.
Drumm hani au immer chlini Wurschstückli übercho.. hei, hani dänkt, isch das es Läbe.
D'Marianne, het aber wo mir alli mied gsi si, au no miesse atrabe. Dört gits es Theorielokal, gheizt, und mir Chline
händ dört uf usere Plätzli chönne schlofe, während Fraueli und Männli händ miesse Theorie büffle.. jo, die sölle nur au öpis mache!!!
I freue mi scho uf e nächschte Sunntig und bi neugierig, was denn eso passiert...
Also bis bald
Raja


Am Raja sini zwöi Kollegä............

Zurück zum Seiteninhalt | Zurück zum Hauptmenü